Der Ausscheller määnt

Nä, nä, nä ihr Leit….jetzt ist dess Jahr 2021 aach schun widder e paar Woche alt. Dess neie Jahr hodd dort angefange, wo es alde uffgehert hodd…in de Corona Pandemie, die hodd uns alle noch immer im Würgegriff. Also ich trag jo schunn seit Monate de Orischinal ULKer Mund-Nase-Schutz, wie die meiste sicher aach schun gesehe hawwe, wenn sie bei mir am Marktplatz vorbei komme sind. Und selbstverständlich beacht ich stets die Hygiene- Vorschrifte. Ich bleib uff moim Sockel stehe und bewesch mich kään Milimeter.

Als des ganz Theater im März 2020 los ging, habbe die Meiste gedenkt, dass der Spuk spätestens an de Weihnachte ein Ende hätt. Vun Wesche Onkel Otto, jetzt schreibe mir Januar 2021 und die Infektionszahle steige immer noch und en ganz harte Lockdown iss uns beschert worn. Ei in mansche Regione darfte sogar nachts nicht mehr uff die Gass.

Ich habb jetzt die Hoffnung, dass die Impferei dezu beiträgt, dass die negative Zahle imm Summer zurückgehe. Awwer, wenn in dem Tempo weiter geimpft wird wie momentan, seh ich schwarz. Ich habb den Oidruck in Berlin un Brüssel kenne paar nicht rechne. Was willsde dann mit 300.000 Impfdosen, wenn alläns schun bei uns in Deutschland über 80 Millione Mensche lebe. Dess war doch alles schun im Summer 2020 absehbar und aach berechenbar. Hätt mer do nit bereits entsprechend reagiere könne? Ich mään, do mist mer emool ein paar Herrschafte zum Nachsitze in de Mathematik Unterricht schicke. Wahrscheinlich hadde die in de Schul in Sport die Note sehr gut, in Rechnen war´s, mit Rücksicht uff die herzkranke Eltern, grad noch so mangelhaft.

Wie sagte emool en schlaue Mensch “Denk ich an Deutschland in der Nacht – bin ich um meinen Schlaf gebracht”. Was hodd der Recht gehabt.

Ansonste date mir jo zuzeit die 5. Jahreszeit, unser schee Fassenacht also, feiern. Corona hodd aach die dies Jahr kaputt gemacht. Kää Helau Kään Narrhallamarsch, Kää Sitzunge bei de ULKer! Kää Umzug!

Vielleicht kennt mer doch emool wenigstens e paar Fastnachtsfahne uffhänge, damit die Leit daran erinnert, dass ebe grad die scheenste Woche im Jahr sin.

Es iss afach e trostlos Zeit und ich hoffe, dass die bald vorbei geht. Der Bazilus Carnevalis soll jeden widder anstecke und nit Covid 19!

Des määnt aach 2021 widder

Eiern Ausscheller