Der Ausscheller määnt

Ja, ihr Leit es Christkindsche steht bald vor de Tür, die Kalennerblätter wern als wenischer unn 2021 is nit mer fern. Zeit also ein Resümee zu ziehe.

Es war ein ganz traurisches Jahr, Corona hat seit März alles, awwer aach werklisch alles, überschattet. Neie Wörter hodd mer kennegelernt. Wer wußt donn bis dohi was Lockdown, Home-Office, Home-Schooling oder Shutdown hääßt. Im Summer sin die ganze Festcher wie Rebblütefest und Kerb ausgefalle. Unser Fassenacht hodd es donn aach voll erwischt. Kää Feiern am 11.11. und aach sunst war außer Spese (selbst die gab´s nit) nix gewese. Grad die ULKer hadde sich doch so uff dess Jubiläum vun ihrm Große Rat gefreut, dess sollte gebührend gefeiert wern. Die Chorprobe bei de Gesangsvereine, die fröhliche Stammtische bei de ULKer, die Übunge vun unserer Feierwehr…nix is mehr gelaafe. Kommunione, Konfirmatione unn Familiefeiern ersatzlos gestriche. Unn des gonze ging so weit, dass viele vun ihre verstorbene Familieangehörige kään Abschied mehr nemme konnte. So was will mer nit erlewwe.

Nää, schee war unn iss dess alles nit und ich fürcht aach im neie Jahr wird uns Corona bzw. Covid 19 noch e ganze Zeit long in Atem halde unn uns viel Geduld abverlange.

Nei war aach dess Wort: Querdenker. Wenn mer sich die Leitscher emool genau oguckt, scheine dess aber Quertreiber zu soi, die scheinbar Langeweil hawwe und nit wisse, was sie mit ihrer viel Freizeit ofange soll. Die könnte doch in die Seniorenheime gehe unn Leit besuche, die kää Angehörige mehr hawwe. Schlimm war´s aach fer unser alde Leitscher in de Senioreheime sowieso. Viele Woche durfte die keinerlei Besuch erhalde. Dess erinnert mich an die 70er Jahre, als mer in Zusammehang mit dene Gefängnisinsasse der Baader-Meinhof Bande dess Wort “Isolier-Haft” geprägt hodd. Also, wenn dess fer unser Seniore kää Isolier-Haft war, wäss ich aach nit. Dess Jahr 2020 war werklisch alles onnere als schee. Mir könne nur hoffe, dass 2021 unner einem besseren Stern steht. Gehe mer also voller Zuversicht und Hoffnung in´s neie Jahr.

Ich wünsche Euch all e froh Weihnachtsfest und en gute Rutsch in´s Neie Jahr und vor allem gebt uff Euch acht, dass Ihr all gesund bleibt.

In diesem Sinne alles Gute…..Eier Ausscheller